Saturday, December 22, 2012

Missie rollemskaats

(Blog skakel)

Woensdagaand van 9:00 PM tot 12:30 AM het ons 'n mission rollemskaats/rollerblade gedoen van so by die 18.7km ver vanaf Queens Park, verby Randwick, Kensington,Alexandria, Surry Hills en terug deur Darlinghurst terug tot waar ons begin het.  Daar was so 13 skaatsers.  Daar is voorwaar baie fietsroetes om te skaats in die stad en watter beter oefening.

Hier is die kaart roete wat ek met my Garmin Foretrex 101 opgeneem het.


View Rollerblade 20121219 in a larger map




Aussie Krismis

(Blog skakel)

Soos in meeste ander lande in die suidelike halfrond is 'n wit kersfees met sneeu so uit soos koekies in die weeshuis, want dis eenvoudig te warm hier.  Hoe komies is hierdie video van die kersfees vaders wat Surf in hulle warm jasse nie?
Hier is 'n video van die Kersfees TV advertensie van 'n kruideniersware winkel ALDI wat nou hier op ons TV wys:



Sunday, December 16, 2012

Eerste somer snorkel by Clovelly strand

Hierdie naweek was dit weer 'n heerlike dag by die see.  Ons het ons skuilinkie op die strand opgeslaan teen die son se ergste strale, heerlik gekuier en gesnorkel saam met vriende.  Hier is sommer so 'n kort video van die visse wat ek gesien het.

Snorkel by Clovelly



Kersfees liggies

Hierdie tyd van die jaar versier die mense hul huise en kerke alte fraai met die helderste en veelkleurigste kersfees liggies.  As jy in jou motor spring en na donker bietjie gaan rondry is daar op telke plekke net liggies waar jy kyk  Hier is 'n paar fotos wat ek gisteraand geneem het.  (Kliek op die huise en kerke om te sien waar)





























Friday, December 14, 2012

'n Oorsig oor ons Suid Afrikaanse geskiedenis tot die slag van Spioenkop

(Skakel na hierdie inskrywing)

Alhoewel ek hier in die verte bly, lê my land van herkoms se geskiedenis my steeds naby aan die hart - dit het my gemaak wat ek is en wie ek is.  Ek lees op die oomblik 'n boek van Thomas Pakenham oor die Anglo Boereoorlog (ISBN: 1868420744). Wat vir my so fassinerend is, is die groot hoeveelheid hoë kwalitiet fotos wat daarin is wat die mense van daardie tyd tuisbring aan mens).  

Toe kom ek af op die volgende paar uitstekende vertellings van die geskiedkundige verteller. Raymond Heron.

Hy gee in 'n kort paar videos vir mens so 'n goeie oorsig van ons hele geskiedenis van Jan Van Riebeeck af tot by die slag van Spioenkop waar die Boere teen die Britte geveg het.

Battle of Spionkop: Webisode 1: Narrated by Raymond Heron
Battle of Spionkop: Webisode 2: Narrated by Raymond Heron
Battle of Spionkop: Webisode 3: Narrated by Raymond Heron
Battle of Spionkop: Webisode 4: Narrated by Raymond Heron
Battle of Spionkop: Webisode 5: Narrated by Raymond Heron
Battle of Spionkop: Webisode 6: Narrated by Raymond Heron
Battle of Spionkop: Webisode 7: Narrated by Raymond Heron
Battle of Spionkop: Webisode 8: Narrated by Raymond Heron
Battle of Spionkop: Webisode 9: Narrated by Raymond Heron


Raymond Heron gives a gripping account of the perils of war and draws you into the narrative.  He really knows his subject matter and brings the year 1900 to life as if one's present to experience it.


Daar is ook nou 'n permanente skakel aan die regterkant van my blog na 'n permanente bladsy waar ek al die interessante inligting oor ons ryke Suid Afrikaanse geskiedenis gaan plaas.

Ek hoop julle vind dit insiggewend
Groete van die Boertjie in die verte

Wednesday, December 12, 2012

My gunsteling tydverdryf op die trein en bus - oudio vertellings/podcasts oor tegnologie en geskiedenis

(Skakel na hierdie inskrywing)

Een van die groot salighede wat my hier in Australië te beurt geval het is die feit dat ek nie meer soos in my geboorteland in die oggende en middae in verseersknope hoef vas te sit nie.  Ek laat daardie las oor aan die busdrywers wat my in die oggende by die stadie moet aflewer.  As die busrit langer vat is dit alles vir my heel gewensd, want dit beteken eenvoudig dat daar meer tyd is om na my gunsteling potgooie (podcasts) te luister.  Hetsy op die bus of op die trein traak die tyd my nie meer soveel nie, want ek kan in elk geval nie meer daaraan verander nie.  Dan sit ek maar eerder rustig en ontspan terwyl ek my wy aan intellektuele stimulasie uit die boonste rakke.


Ek het al heelwat oudioboeke en "podcasts" deurgeluister op die trein in die oggend en die middag.


Soos wat ek luister na allerlei temas oor tegnologie, wetenskap en geskiedenis leer ek op hierdie manier ontsettend baie van die wêreld rondom my.  Ek het heelwat gunsteling potgooie waarna ek luister en ek wil graag die RSS skakels met julle deel sodat julle ook daarna kan luister:

Die RSS feed skakels na my heel gunsteling podcasts is die volgende: (Julle behoort dit te kan gebruik om jul oudio spelers op te stel.)

Indien julle hul webtuistes wil deursoek:
Tweedens is ek baie lief vir Geskiedenis.  Hulle sê in Aardrykskunde en sterrekunde leer 'n mens oor waar jy is in ruimte, terwyl jy weer in Geskiedenis leer waar jy jou bevind in tyd.  Dit help jou om jouself te kan plaas in alle eeue.

Van my gunsteling Geskiedenis PodCasts wat ek al deurgeluister het is die volgende:

  • Die geskiedenis van Alexander die Grote - deur Jamie Redfern
    560 vC tot 276 vC

    Hierdie podcast handel oor die tyd voor, gedurende en na die lewe van Alexander van Macedonië (noord van Griekeland) wat in 356 vC gebore is en in 323 vC oorlede is en in sy kort lewe van net 33 jaar die eens magtige Persiese Ryk onder Darius II op hul neus laat kyk het.
    Daarword baie agtergrond gegee oor die Persiese ryk wat Alexander voorafgegaan het, tot so ver terug as 560 vC.  Dit dek selfs die oorlog in 480 vC  tussen die Grieke, Spartane en die Persiese koning Xerxes I in die oorlog van in die fliek 300 so goed uitgebeeld is, waar koning Leonidas van die Spartane gespeel is deur Gerhard Butler.
    Die storie van Alexander begin by die oorloë van sy pa, Philip II van Macedonië om en by 358 vC teen onder meer Bizantium (die oos Romeinse Ryk), die geboorte en lewe van Alexander totdat hy op die ouderdom van 16 jaar saam met sy pa in oorloë teen die Grieke in Athene en later saam met die Grieke teen die Persiese Koning Darius II.  Dit vertel die storie van hoe Alexander al op ouderdom 33 kort voor sy dood die hele mediterreense streek insluitende Egipte, Babilon tot sover as Indië onder sy beweind gehad het.  Daarna word daar ook verduidelik wat met die Grieks/Macedoniese ryk gebeur het tot en met 276 vC wanneer die Romeinse Ryk na vore begin tree het.  Dit is ook in die tyd dat die Gaulliers (soos in Asterix en Obelix) begin het.

    Dit is 'n uitstekende podcast deur Jamie Redfern en julle kan na sy blog gaan kyk by:
    thehistoryofpodcast.blogspot.com.au.
    Die RSS feed van die Alexander Podcast is:
    RSS FEED : Die Geskiedenis van Alexander van Macedonië : http://thehistoryofpodcast.weebly.com/uploads/1/3/4/7/13473658/alexander.xml

    Of as julle wil kan julle aanlyn daarna gaan luister by:
    www.learnoutloud.com : A-History-Of-Alexander-the-Great

  • Die Geskiedenis van Hannibal en die oorloë tussen die ryk in Carthage in noord Afrika (nou Tunisië) en die Romeinse Ryk - deur Jamie Redfern
    264 vC - 182 vC
    Dit handel onder andere oor hoe Hannibal 'n weermag met olifante deur die Alpe gelei het.
    RSS FEED : Die geskiedenis van Hannibal van Carthage
    www.learnoutloud.com : A-History-Of-Hannibal

    Dit is nog 'n podcast van Jamie Redfern (wat met sy Noord Engelse/ Ierse aksent en humorsin die geskiedenis besonder lewendig kan maak)

  • Die Geskiedenis van Rome - deur Mike Duncan
    800 vC - 480 nC

    Besoek Mike se blog by 
    thehistoryofrome.typepad.com
    Luister dit aanlyn bywww.learnoutloud.com : The-History-of-Rome
    Dit is 179 episodes wat handel oor die ontstaan van Rome (om en by die tyd van die Trojaanse Perd) tot en met die val van die Westelike Romeinse Ryk om en by 405 nC.  Die vaandel van die Romeinse Ryk is verder deur die Oosterse Romeinse ryk in Konstantinopel as die Bizantynse Ryk voortgedra to sover as 1453 nC waaroor julle kan leer in 'n podcast van Lars Brownworth.

  • Die Geskiedenis van die Bizantynse/Oostelike Romeinse Ryk aan die hand van 12 Bizantynse Regeerders - deur Lars Brownworth
    285 nC - 1453 nC

    Hierdie is 'n in-diepte en baie insiggewende podcast wat handel oor die Oos Romeinse Ryk wat deur Keiser Konstantyn in Konstantinopel (nou Instanbul in Turkye) begin is. Dit dek ook die geskiedenis voor die vol van die Westelike Romeinse Ryk gesetel in Rome.
    RSS FEED : 12 Byzantine Rulers
    Luister dit aanlyn by Lars se webtuiste : 12 Byzantine Rulers : The History of The Byzantine Empire (By Lars Brownworth) : 12byzantinerulers.com
    Dit begin in 285 nC toe die Romeinse keiser Diocletian die Romeinse Ryk opgesplit het in die Westelike en Oostelike Romeinse Ryk, met Rome as die hoofstad van die Oostelike Ryk en Bizantium (Later Konstantinopel) as die beter hoofstad van die Oostelike Romeinse Ryk.  Dit was alles gedoen om die Ryk beter te kan regeer.  Dit dek  die lewens en tye van 12 van die Oos Romeinse Ryk se Keisers en eindig in 1453 nC met die val van Konstantinopel tydens die inval van die Turke en die dood van die keiser.   Die Byzantynse Ryk word gesien as die skans wat die kultuurskatte en westerse kultuur van die Romeinse Ryk vir eeue vir die latere nageslagte behoue laat bly het juis omdat dit vir 'n hele 1000 jaar na die val van Rome nog weerstand kon bied teen die inval van die oosterse plunderaars- met Konstantinopel 'n tipe van 'n Fort wat die insuipeling gekeer het.
    Baie geskiedenis oor die Gotiese volke soos die Vandale, die Lombarde, Franke en die Normanne word ook genoem, maar die meeste oor die Noormanne kan julle leer in Lars se ander podcast: Norman Centuries.

    Lars Brownworth is 'n uitstekende geskiedenis verteller en sy vertellings sal julle geboei hou.  Maak gerus 'n draai op sy blog : Finding History

  • Die Geskiedenis van die Noormanne / Vikings - deur Lars Brownworth
    793 nC - 1194 nC
    Luister aanlyn na hierdie uitstekende podcast : Norman Centuries 
    Dit begin met die plundering van die Europese wêreld van Westelike Europa en Brittanje deur groepe van Skandinawiese Viking "avonturiers".  Dit vertel die storie van 'n Noorweegse Viking Rolf die Viking wat so groot was dat hy altyd net gestap het omdat hulle nie 'n perd kon kry wat hom kon dra nie.  Daar word vertel van hoe Karel die Grote (Charlemagne) se Frankiese koningkryk toenemend die prooi was van hierdie  Noormanne wat die kus van Noordelike Frankryk geplunder het.  Uiteindelik het die Franke in 911 nC  besluit om vir hulle 'n groot kusstreek te oorhandig wat ons nou ken as Normandië - in ruil daarvoor dat hulle die Christelike geloof aanneem en hulle "beserker" gode Odin opgee.  Op hierdie manier moes die Vikings hul eie grondgebied beskerm. Daar word breedvoerig ingegaan op die magtige Vikings wat eeue lank die beskaafde wêreld geterroriseer het. Vikings het ook Brittanje ingeval en selfs Dublin in Ierland gestig.  Hulle het Konstantinopel ingeval en selfs Rusland se naam is van hulle afkomstig.  Die lewens van baie van die Noormanne word behandel asook die inval van Brittanke deur William die Veroweraar.  Later was daar selfs 'n Noorweegse koning op die Britse kroon sodat daar tot vandag nog bande tussen die Britse en Noorwee is.

    Dit is 'n baie, baie interessante podcast en ek sal dit hoogs aanbeveel.
    RSS FEED : Norman Centuries posdcast

As julle aan die regterkant van my blog kyk sal julle altyd 'n skakel na hierdie bladsy met potgooie kry. Ek sal dit altyd probeer bygewerk hou soos ek nog oudio podcasts ontdek.

Sunday, December 09, 2012

Om Sydney stad op rollers te neem

(Skakel na hierdie inskrywing op die blog)

Wat as ek vir jou sou vertel dat hier in ons geweste is 'n skaatsbaan so groot soos 'n stad.  Om die waarheid te sê...net so groot soos jy dit wil hê.  Alhoewel daar ook ysskaats bane hier in Sydney is, is hierdie 'n rolskaatsbaan.  Amper soos mens by Margate altyd gekry het, maar net 'n buitelug een - 'n massiewe groot skaatsbaan onder die sterrehemel.

Met die warm someraande wat nou naderkruip is dit 'n ideale geleentheid om vir jou 'n paar rollemskaatse aan te skaf en bietjie oefening te kom kry hier in Sydney, want elke Woensdagaand in die hartjie van die middestad hier in Sydney neem enigiets van 10 to 100 bittereinder skaatsers die stad op horings op hul skaatse.  Die groep bestaan al 20 jaar en skaats elke Woensdagaand verskillende roetes deur die stad.  Hul ouderdomme wissel van die twintigs tot in die sestigs, en daar is mense van allerlei beroepe en lande.  Die skaatsers begin so 9 uur in die aand saamdrom op die trappe van die "Land Titles Offices" aan die regterkantste boonste hoek van Hyde Park.


Die Sydney Bladers se offisiële webtuiste is by www.sydneybladers.com waar julle meer inligting kan kry.

Julle kan die groep wat reeds meer as 600 lede het se Facebook bladsy gaan besoek by hierdie skakel.
Hierdie jaar se "Chrissie skate" fotos is by hierdie skakel

Die volgende fotos het iemand Woensdag geneem.  Dit was die jaarlikse skaats aand met 'n Kersfees tema, wat gewoonlik so aan die begin van Desember plaasvind.  Dit is amper soos 'n stapklub, maar net op rolskaatse.  Ek het Woensdagaand saam met hulle gaan skaats en hulle het my dadelik welkom laat voel.  Dit het gevoel of ek 'n nuwe speelding ontdek het, want dit was die eerste keer wat ek Sydney stad op hierdie manier in die aand leer ken het.  Watter beter manier om 'n stad se hoekies en draaie te leer ken as om dit saam met 'n klomp mense wat jonk van gees is te doen.

Kyk of julle die "Rustige Swerwer" rollerblader met sy Madiba hemp aan tussen die mense in die volgende fotos kan vind....












Omdat die eerste Woensdagaand van elke maand spesiaal ingestel is om mense uit te nooi wat nog nooit in die aande in Sydney geskaats het nie, word daar dan altyd 'n vasgestelde roete geskaats.  (Maar die laaste Woensdag is Mission Skate aand waar daar tot 25 kilometer so ver as die lughawe geskaats word).  Ons begin naby Hyde Park en die groep skaats dan deur die park se plaveisel verby die fonteine in Hyde Park.  Daar word op die sypaadjies en arkades langs die strate geskaats al langs Pitt street tot by Martin Place waar daar op die oomblik 'n tamaai kersfeesboom opgerig is.  Hier is daar toe eers fotos geneem vir die vale om hierdie groot jaarlikse gebeurtenis te onthou.  Vandaar het ons met George street se sypaadjies langs geskaats tot by Circular Quay en die Sydney Operahuis.  Wie kan sê dat hulle al om die Operahuis geskaats het op rollemskaatse?  Dit was heerlike oopgetrekte weer vir 'n skaats in die stad.  Daar was 'n groot plesierskip by die internasionale passasiers-terminaal vasgemeer en ons het verby dit geskaats deur "The Rocks" in die rigting van die Hawebrug.  Dis ongelooflik hoe baie gladde skaatsplekke daar hier is.  Onder die Hawe Brug is daar eers weer fotos geneem.  Op die video wat ek julle nog later sal wys sal julle moontlik die honderde vlermuise of "flying foxes" sien wat in die aande bo teen die hawebrug swerm.

Hierna is ons om die "Wharf"s by Dawes Point waar daar fantastiese rolskaatsplekke is soos julle kan sien op hierdie satelliet fotos.  Hierna het ons koers gekies Darling Hawe toe waar daar heerlike fietspaaie is vir rollerblading en toe is ons terug deur die stad verby die Sydney tower tot by Hyde Park.  Ons het seker eers so 22h00 begin skaats omdat ons vir almal gewag het, maar die plan is om 21h00 te begin skaats omdat die strate dan nie meer so baie motors in het nie (alhoewel ons nie juis op die strate skaats nie maar op die fietspaaie).  Ons was seker weer so 23h50 terug by die beginpunt.

Hier is 'n Google Kaart van die roete wat ons geskaats het:


Kyk na Sydney Bladers Chrissy Skate 05/12/2012 9:45pm op 'n groter kaart

Die totale afstand was: 11.81 km
Total tyd: 1:56:15

Gemiddelde skaats spoed: 8.14 km/h
Maksimum spoed: 35.26 km/h
Gemiddelde pas: 7.37 min/km
Maksimum hoogte: 92 m
Minimum hoogte: 12 m
Hoogte geklim: 358 m
Max grade: 33 %
Min grade: -28 %
Opgeneem: 05/12/2012 9:45pm


Hieronder is die hoogte profiel vir die wat belangstel.





Dit is heerlike oefening om die minste te sê - en mens ontmoet soveel nuwe mense. Daar was mense van Brasilie, Tjeggo Slowakye, Amerika, Portugal en vele meer.  Die feit dat mens 'n Suid Afrikaanse aksent het veroorsaak natuurlik ook baie belangstelling.


Ek het hier en daar video geneem, maar verskoon tog asseblief die kwaliteit, want my kamera se sluiterspoed is nie so vinnig in die aande nie en dit maak dat die video sulke liggie strepe maak wanneer jy vinnig op jou rollerblades beweeg en daar is nie regtig 'n manier om te kompenseer daarvoor nie.

Hier is die skakel na die video op YouTube.  Dit is sowat 15 minute lank en begin in Martin Place, wys hoe ons langs George street af skaats tot by Circular Quay.  Julle sal rondom en onder die Operahuis sien, dan langs die Rocks waar die plesierboot gestaan het, onder die Sydney Hawebrug deur, enn al die pad tot by Darling Hawe, vanwaar ons terug is na Hyde Park.




Saturday, December 08, 2012

'n Oomblik in tyd kan soms die hele verloop van jou geskiedenis verander

(Skakel na hierdie inskrywing)


Woensdag 5 Desember 2012 was 'n besondere mylpaal in ons lewens.  Ons kom nou al 'n vêr pad sedert on die eerste keer op die Australiese kontinent voet aan wal gesit het.  Hierdie besondere mylpaal waarvan ek praat is natuurlik die Australiese Burgerskap Toets wat ons Woensdagmiddag in Parramatta by die "Australian Department of Immigration and Citizenship" (DIAC) geskryf het.  

Hoe belangrik is drie maande in 'n leeftyd?  Dit was net sowat 0.7 % (bietjie meer as 'n halwe persent) van ons lewens, maar dit het verrykende gevolge vir ons toekoms asook ons hele nageslag ingehou...  Want binne drie maande vandat ek daardie Januarie in 2007 my CV vir 'n maatskappy hier in Sydney gestuur het, was ons pens en pootjies in 'n nuwe land.  Ha ha, my vrou sê mos ek oordryf altyd so 'n bietjie, maar neem dit maar met 'n knippie sout. 

Nooit eens gedroom van oorsee gaan vakansie hou op daardie stadium nie, my hele lewe in Pretoria grootgeword en gewoon, maar binne 'n tyd van drie maande was ons hier in Sydney.  Van die aangesig van die aarde af verdwyn...dis seker wat die inkomstediens in Pretoria dink wat met ons gebeur het, want ons het met 'n enkelkaartjie hiernatoe gevlieg en een van die dae word ons hier burgers.  Wat eens net 'n plan was, word nou 'n werklikheid.

Net soos baie immigrante in vorige eeue Amerika, Australië en regoor die wêreld in die nastrewe van geluk en 'n beter toekoms aan wal gegaan het, net so word ons een van die dae trotse burgers van hierdie land.

Burgerskap is nie 'n kleinigheid nie.  Mens gaan bly en werk nie sommer net goedsmoeds in 'n ander land nie.  'n Mens kan nie eens landsgrense oorsteek soos jy wil nie.  Miljoene mense smag elke dag om te kan ontsnap uit hul omstandighede, maar helaas kan hulle nie net vlug uit hul omstandighede nie, en word soos ingehoktes gevange gehou in sommige lande.  

Dit is 'n groot voorreg om 'n nuwe land se burger te kan word. Dit is nou nie juis maklik om tot op die' punt te kan kom nie, maar waar daar 'n wil is is daar 'n weg

Selfs in Paulus se tyd was dit as 'n baie groot voorreg beskou om 'n Romeinse Burger genoem te kan word.  Dit is 'n feit wat op 'n keer selfs Paulus se lewe gered het:

HANDELINGE 21:39
Daarop antwoord Paulus hom: “Ek is 'n Jood van Tarsus in Silisië, 'n burger van 'n belangrike stad. Laat my asseblief toe om die volk toe te spreek.”


HANDELINGE 22:29
Die soldate wat vir Paulus moes gesel, het hom dadelik losgemaak, en selfs die kommandant het bang geword toe hy besef dat Paulus 'n Romeinse burger is en dat hy hom laat boei het.


HANDELINGE 23:25-29
Hulle het hom alreeds vir die geseling vasgebind gehad toe Paulus vir die kaptein wat daarby staan, vra: “Mag julle 'n Romeinse burger gesel, en boonop nog sonder verhoor?
Toe die kaptein dit hoor, gaan hy na die kommandant toe en sê: “Wat gaan u doen? Hierdie man is 'n Romeinse burger.
Die kommandant gaan vra toe vir Paulus: “Sê vir my, is jy 'n Romeinse burger?” “Ja,” antwoord Paulus.
Toe sê die kommandant: “Ek het 'n groot som geld betaal om die burgerreg te verkry.” En Paulus sê: “Maar ek het dit deur geboorte gekry.”
Die soldate wat vir Paulus moes gesel, het hom dadelik losgemaak, en selfs die kommandant het bang geword toe hy besef dat Paulus 'n Romeinse burger is en dat hy hom laat boei het.



Watter groter voorreg het ons nie as dit nie:

FILIPPENSE 3:20
Maar ons is burgers van die hemel, van waar af ons ook die Here Jesus Christus as Verlosser verwag.


Mens gaan deur baie emosies en het vele ervarings langs die pad, maar uiteindelik as jy terugkyk kan jy sien alles was sover die moeite werd.

Die hoof aktiwiteit by die afspraak wat mens by die departement het is natuulik nie die toets nie, maar eerder die nagaan van al jou verskeie ID dokumente om jou sodiende op die Australiese Departement van Binnelandse sake se rekords oor te plaas as 'n WARE BURGER van die nuwe land.  Daar word na geboortesertifikate, huweliksertifikate, paspoorte, bestuurderslisensies, Medicare kaarte en bewyse van verblyf gekyk om te verifieer dat jy wel aan al die vereistes voldoen en jy nie op een of ander manier die VISA proses omseil het en nou sommer kortpad wil kies na Burgerskap nie.  

Daar word ook 'n verdere soektog deur die Federale Polisie gedoen om te verseker dat jy nie in die laaste paar jaar 'n kriminele rekord opgebou het nie.  Indien mens dalk meer as 365 dae in die buiteland was (gelukkig nie op my van toepassing nie), dan moet daar ook 'n oorsese kriminele rekord soektog gedoen word.
Ek het nie heeltemal geweet wat om te verwag in die toets nie, behalwe vir die feit dat al die 20 "monkeypuzzle" vrae in dietoets sou kom uit die PDF dokument wat ek reeds vooraf deurgelees het en ook vanuit die videos oor Burgerskap wat op Youtube beskikbaar is.
Dit alles handel oor jou regte en voorregte as 'n nuwe Australiese burger asook hoe die Australiese regeringstelsel werk.

Aan die hand van die volgende belofte wat mens by 'n burgerskap seremonie gaan aflê...

From this time forward, under God,

I pledge my loyalty to Australia and its people,

whose democratic beliefs I share,

whose rights and liberties I respect, and

whose laws I will uphold and obey


word daar aan jou verduidelik wat dit beteken:
- Wie is Australië se mense
- Watter demokratiese beginsels dit is wat ek ook in glo
- Watter regte en vryhede die fondament vorm van die leefstyl hier in Australië
- Watter wette die land se vryheid op berus

Mens kry 45 minute om die toets te voltooi.  Ek stres gewoonlik oor enige toets. Dit kom seker van skooldae af, maar ek het verniet gestres, want die toets was toe glad nie so moeilik nie en ek het dit met rasse skrede geslaag...iets wat julle ook sou kon doen.

Ek dink dit het nie eens 5 minute geneem nie.  Nou gaan ons laat weet word wanneer ons na Baulkham Hills Stadsraad toe moet gaan vir die Offsiele seremonie waar die belofte afgeleê gaan word.

Ten minste "pledge" ek nie my "allegiance" aan 'n koning of koningin nie, maar aan die Australiese mense wat so deel geword het van my lewe oor die laaste amper 6 jaar: die mense wat ek elke dag groet op die bus, die mense by my kinders se skool, die mense wat saam met my by die werk is en saam skouer aan die wiel sit elke dag...al die mense wat saam met my glo aan 'n vrye, veilige en gelukkige toekoms vir ons en ons kinders.

'n Land waar meer as 1 uit elke 4 mense net soos ek van êrens oor die see af gekom het om hier 'n nuwe plekkie in die son vir onsself uit te kerf. 

Net soos mens net "anders voel" wanneer jy uiteindelik jou permanente VISA gekry het om vir altyd hier te kan bly en jou hele toekoms nie in die hande van iemand anders lê nie, net so, voel mens effens meer tuis wanneer jy deur die formaliteite is en jy weet: jy is nou oor die perd se rug, die koeël is nou deur die kerk - jy is nou so Aussie soos Jan Rap en sy Maat.

Die voorregte wat ons nou bykry is die volgende:
- Ons kan nou ons stemreg uitoefen in verkiesings
- Ons kan (indien ons sou wou) in die Australiese Weermag, Lugmag of vloot gaan werk of by staatsdepartemente soos Medicare, Centrelink of die inkomstediens.
- Ons kan staan as kandidate om verkies te word vir die parlement
- Ons kan 'n Aussie Paspoort kry en het nie meer papierwerk nodig (soos 'n resident return visa) as ons buite die land wil reis nie
- Ons kan ons kinders wat oorsee gebore is as "True Blue" Aussie burgers registreer met dieselfde regte as die wat hier gebore is.
- Ons kan op Australiese ambassades se knoppie druk vir hulp oorsee
- Ons kinders kan met baie goedkoop lenings vanaf die regering by universiteite gaan studeer en eers begin terugbetaal as hulle meer as 'n sekere hoeveelheid verdien in hul werk

Ons kry ook verantwoordelikhede by:
- Ons moet die wet gehoorsaam (en niemand wat burgerskap het kan op "diplomatic indemnity" aanspraak maak omdat hy van 'n ander land is nie)
- Ons moetr registreer in verkiesings
- Ons MOET stem in verkiesings of 'n boete betaal
- Ons moet Australië verdedig as daar 'n oorlog sou uitbreek
- Ons moet op 'n jurie dien in 'n hofsaak as ons opgeroep word daartoe


Thursday, November 29, 2012

Skulpe

Wanneer mens partymaal gaan stilstaan en baie mooi van naderby kyk, sien jy die natuur weer uit 'n nuwe oogpunt. Soms gaan die fynste detail van die lewe ons verby omdat ons eenvoudig te haastig is. Ons lewe is maar 'n spikkeltjie in tyd in vergelyking met die onmeetlikheid van die aarde se bestaan.   Sien ons ooit die detail van die spiraal-patrone op die kleinste skulpe raak?    Soms moet mens dit bietjie doen.

Elkeen van hierdie skulpe was eens op 'n tyd 'n slakkie of seediertjie se huis. 



Foto Album van skulpe op Tea Gardens se strand

En hoe fyner mens kyk, en hoe groter die sandkorreltjies word, hoe meer sien jy dat die sandkorretjies nie net maar klein klippies is nie, maar oorblyfself van derduisende jare se gemaal deur die see.



Tuesday, November 27, 2012

Mooi blomme by Tea Gardens se strand

(Skakel na hierdie blog inskrywing)

Ek kan 'n mooi blom net nie verbystap sonder om 'n foto te neem nie. Wanneer ons op 'n staptog is by een van die magdom roetes hier rondom Sydney, is ek altyd die agter-os wat vashaak langs die pad om van naderby fotos te neem van blomme of insekte.

Die volgende klompie fotos het ek by Tea Gardens strand in NSW geneem. Sommige van die blommetjies (soos in die volgende foto) is letterlik 1 cm in grootte.


Mooi blommefotos by Tea Gardens




Monday, November 26, 2012

Insekte en spinnekoppe

(Skakel na hierdie inskrywing)

Toe ons by Tea Gardens naby Hawks Nest was het ek so 'n paar fotos geneem van insekte. Nou nie juis fotos van hoogere wetenskaplike waarde nie, maar tog vir my mooi.

Ek het die volgende twee Ladybirds afgeneem terwyl hulle baie besig was om klein ladybirds te maak.


Insekte en spinders by die see





In die volgende fotos kan julle onder andere die algemene Australiese Golden Orb Silkweaver (Nephila macalata) Spinnekop sien. Hulle is baie volop en spin indrukwekkende webbe sommer oornag. Hulle word nogal redelik groot en daar is gevalle waar hulle selfs al 'n slang verorber het. Hul gif is ook 'n senuwee-gif soos die van die knopiespinnekop, maar nie so kragtig nie.



Daar is ook 'n by wat nektar versamel.

Sunday, November 25, 2012

Rollerblade in Randwick

(Skakel na hierdie inskrywing)

Ons was in Randwick om by SkaterHQ nuwe briekskoene te koop vir Rollerblades.  Omdat Randwick so 'n gevestigde voorstad is, is daar heelwat fietspaaie wat 'n ideale speelplek bied vir Rollerblade entoesiaste.
Hier is die kaart waar ons gery het.

Rollerblade in Randwick 20121124



Hier is die Google Streetview


View Larger Map

Tuesday, November 20, 2012

Son silhoeët by die Teëtuin

(Skakel na hierdie inskrying)

As die son vroegoggend sy groue strale so sleep-sleep oor die sand tot teen die duine laat vaar, dan weet ek hulle was reg toe hulle gesê het: die môrestond het goud in die mond.  
Dit verf vroegoggend die natuur met 'n warm geel skakering van skoonheid. Die nuwe dag vee vir mens 'n skoon slyt waarop jy daardie dag weer kan lewe. 

Mens kan die lewe sommer net makliker in die oë kyk as jy eers 'n lekker nagrus agter jou het.    Want wie weet wat vandag vir jou inhou.

Ons was so 'n rukkie gelede by die NSW noordkus dorpie: Tea Gardens, waar ek heelwat mooi fotos geneem het wat ek die volgende paar inskrywings met julle gaan deel.

Soms, as mens regtig naby aan die grond kan kom met jou kamera, verkry jy 'n ongewone oogpunt wat vir mens indrukwekkende fotos kan oplewer.

Neem nou maar die volgende paar fotos wat ek met sons-opkoms en geneem het op Jimmys beach.








Net so het 'n sonsondergang 'n enerse bekoring.  Daar is 'n gesegde: die son trek al water.  Wel, as 'n mens die son so by die see sien sak oor die water, dan lyk dit soms kompleet asof die son na sy rusplek onder die water terugkeer.  Die dag se moeite is verby en more is nog 'n dag.  Ek het seker al letterlik honderde kere sonsondergange afgeneem - en steeds bly dit 'n vredevolle ervaring.







Mooi sonsondergange en sonsopkomste by die Tee tuin strand.


Monday, November 19, 2012

Rollerblade in Parramatta

(Skakel na die inskrywing)

Ek het gister saam met vroulief hierdie 10.9 km roete op my rollerblades gaan doen en sy op die fiets.

Hier is die kaart met die roete.


View Rollerblade in Parramatta 18/11/2012 13:25 in a larger map

Hier is die video/ Ek het net gedeeltes van die pad opgelaai.



Hoop julle geniet Lianie en Jay se liedjie. Ek het sommer die James outjie se liedjie ook bygesit omdat dit vir my dieslfde ritme het.

Sunday, November 18, 2012

Besoek aan die "Mall"

(Skakel na hierdie inskrywing)

Jy kan dit skaars glo, maar meeste Saterdae wanneer 'n mens so voor half-nege (of self nege uur) die oggend op 'n Saterdag by die Kasteeltorings Winkelsentrum hier in Castle Hill aankom is daar nog bykans geen motors in die parkeerterrein nie.  Maar, langsamerhand, kom die winkelassistente en handelaars en sluit een vir een die winkeldeure oop.  Mense begin dan van oraloor die winkel binnestroom en voor jy jou kan kry is die plek vol van 'n geroesemoes van aktiwiteit.  

Wat vir my veral lekker is, is om 'n ou koffietjie by een van die baie koffie kafees en winkeltjies te kry.  Meestal vermy ons maar die groot winkels, maar soms as ek my hare by Eric's gaan sny, dan maak ek vroegdag al 'n afspraak.  Dit kos so $29 vir 'n haarsny.  Maar as ek so luister wat die vrouens vir hulle hare betaal, dan is dit 'n aansienlike winskopie.  Ek ken vir Lee Anne al baie goed, en sy sny al vir meer as 5 jaar my hare.  Ons gesels oor alles en nog wat, want jy weet : haarkappers gesels lekker.

Ek hou veral daarvan om in die boekwinkels 'n draai te maak asook die "Newsagency".  Dit is mos nou wat ons winkels soos CNA hier noem.  Mens kan alles van treinkaartjies tot tydskrifte daar koop.  





Teen ententyd drom mense saam in die "Food Courts".  Dit is is nou nie geregshowe waar mense stry oor wie se kos dit is nie, nee, dit is eerder soos 'n nuwerwetse kos lapa of gesamentlike eetsaal.  
Dit was nou iets wat vir my nogal opvallend verskillend was van hoe ek gewoond was dinge in Suid Afrika gewerk het.  Waar elke restaurant of wegneemete winkel daar so half en half sy eie "grondgebied" met 'n passie beskerm, is die gesamentlike eetsaal hier die in-ding.  Wanneer die familie hier kos bestel, dan kan die Pa, Ma en elkeen van die kinders letterlik elkeen kos gaan bestel by verskillende eetplekke en dan sit almal saam en eet en kuier in die middel by tafels en stoele wat nie die uitsluitlike eiendom van enige spesifieke eetplek is nie. Dit is bykans altyd 'n raserige affêre soos julle sal sien in die een video wat ek vir julle opgelaai het.  Veral in 'n stad soos Sydney met meer as 200 verskillende nasionaliteite wat hierdie stad hul woning gemaak het, sal jy kossoorte van baie lande kry.

Ek wys hier vir julle twee videos.  

In die eerste video sal julle begin sien hoe lyk 'n groot "mall" in hierdie geweste.  Ek gaan maak 'n draai by 'n rekenaarwinkel, drie klerewinkels en loop verby die magdom tydelike verkoopspunte wat hierdie tyd van die jaar begin opskiet.  Ek maak ook 'n draai by die oop groete en vrugte mark op die onderste vloer.  Verder gaan ek op en af met roltrappe en probeer vir julle 'n goeie isee gee van hoe die plek hier daarna uitsien.



In die volgende video maak ek verder 'n draai deur die "Food Court" met sy baie wegneem ete plekke.  Julle sal sien hoe die mense vergader tydens etenstye (en daarbuite).  Ek besoek 'n CD Musiekwinkel en op 'n stadium loop ek verby Eric se haarsalon waar ek my hare sny.  Daarna gaan bring ek 'n kort besoek aan die Appel rekenaar winkel.



Die eerste ruk wat ek hier aangekom het, het ek bykans heeltyd verdwaal in hierdie winkelsentrum, maar nou ken mens die plek al so goed jy kan dit amper toe oë verken.


Hoop hierdie videos gee vir julle so 'n kykie in ons wêreld.

Groete
















Saturday, November 17, 2012

Hierdie jaar se City to Surf 2012 Stap vir Liefdadigheid

(Skakel na hierdie inskrywing)

Ek weet, ek weet, hierdie inskrywing is seker heel agter die tyd, maar ek het tot op hede nog nie die fotos op my blog gesit van toe ons hierdie jaar in Augustus die 2012 City To Surf stap vir liefdadigheid meegemaak het nie.  Ek was daarna te besig om voor te berei vir die besoek aan Suid Afrika. Maar eerder laat as nooit.

Elke jaar so om en by 12 Augustus (of in daardie omgewing) is daar 'n stap/draf in die stad wat deur derduisende mense meegemaak word.  Dit is die jaarlikse City to Surf wat vanaf Queens Park in die stad tot by Bondi Beach.  Julle kan die roete wat gevolg is hier en ook hier kry.

Ons het vir Compassion Australia gestap.  

Hier is die fotos op Google Plus.


Julle kan die album hier op Picasa gaan bekyk.
En die volgrootte slideshow hier.

Hierdie jaar was daar meer as 85000 inskrywings.  Die toe die dag aanbreek was dit so effens reënerig, maar ondanks daarvan get 68127 mense die roete volttoi tot by Bondi strand.








Hier volg 'n paar videos wat ek langs die pad geneem het:

Wegspring van 2012 City To Surf

















                                                                                                                         

Met sommige paaie vanaf die middestad tot by Bondi vroeg reeds gesluit vir die resies, is daar sommige mense wat van hierdie gulde geleentheid gebruik maak om te Rollerblade op rol-lem-skaatse.

Die volgende videos is NIE deur my geneem nie...

 Hier is een ou (Lew Keilar) se video voor hierdie jaar se City To Surf



Dit word nou al 'n jaarlikse instelling.  Miskien gaan ek dit ook eendag probeer.

Hier is nog 'n video van mense tydens die City To Surf wat rollerblade in 2009.












Tuesday, November 13, 2012

Fietsry Video in die Fred Caterson Reservaat hier naby ons

(Skakel na hierdie inskrywing)

Wat doen 'n mens as jy vir so 'n uur of wat op 'n Sondag iets aktiefs wil gaan doen in Castle Hill? Wel, een opsie is om te gaan fietsry. Hier in die "Hills" gaan jy heelwat oefening kan kry. Jy kan natuurlik die publieke paaie aandurf, 'of jy kan in een van die baie parke gaan ry. Sondagmiddag soek ek toe op Google vir 'n fietsroete hier in ons omgewing. Ons gaan ry mos soms fiets by Parramatta Park, Centennial Park of Sydney Olympic Park, maar dit is heelwat uit ons pad uit. Ek dink toe daar moet 'n lekker fietsroete hier in ons omgewing wees. Dis mos waar Google Earth handig te pas kom. Spoedig sien ek toe daar is fietspaaie in die Fred Caterson Reservaat in Castle Hill hier naby ons en dit is net so 9 minute se ry (5.6 km) van ons af in Dural.

Hier is die kaart van die Reservaat. Julle kan ook die fietsryroetes vanaf die Satellietfotos eien.


Besigtig Fred Caterson Reservaat Fiets roete op 'n groter kaart deur hier te kliek.

Ek het die roetepunte met 'n Garmin ForeTrex 101 opgeneem wat ek al van toentertyd af in die Drakensberge gebruik het om my pad te vind. Dit kan tot 10000 punte stoor asook 500 "waypoints".

Ons het sommer die roetes gaan verken en ek het die hele verkenningstog van so 8.3 kilometer vir julle op die kaart geplot. Vandat ons begin het totdat ons weer terug was by die kar het ons 'n uur geneem.

Kyk, ek is mos nie wêreld se fiksste ou nie, maar wie gee om, mens doen dit mos vir die plesier daarvan. As mens dit elke keer 'n oefensessie maak sien jy later net op daarteen.  Derhalwe vat ons dit toe redelik rustig.

Ek het vir julle 'n video animasie gemaak van ons roete op die fietse.
Ek het die kaart se orientasie so bietjie gewysig met Gilbert Road aan die bokant sodat die hele roete beter inpas. (Noord is dus nie bo nie, maar die bokant is die Suid-Ooste). Gilbert Rd sluit later by Showground Road in Castle Hill aan.



Hier is 'n foto van die hoogte profiel van die roete soos uitgebeeld in die vorige Google Earth Animasie:


Wanneer mens so op 'n fiets ry, is dit nogal moeilik om heeltyd 'n kamera vas te hou, want jykan jou nogal self te pletter val as jy die kamera in een hand probeer vashou en met die ander hand probeer bestuur. Maar, gelukkig het ek onlangs so 'n vernuftige Sonbril HD videokamera gekry. Dit kan tot 3 ure se 25 raampies per sekonde Hoë Definisie Video neem en dit lyk opsluit nes 'n gewone sonbril. Daar is net een probleem...'n mens se kop is nou nie juis die ideale driepoot nie, en 'n mens draai ook nie jou kop so egalig in die rondte soos RoboCop nie, daarom kan die videos die gehoor partymaal so 'n bietjie "Rollercoaster" laat ry. Julle kan die volume maar so bietjie afdraai, veral waar die wind so raas op die mikrofoon van die kamera wanneer mens vinnig ry.

Ek gee julle hiermee so 'n bietjie van 'n kykie hoe die wêreld vanuit my oë lyk - so asof julle in my KOP is....die spesiale harde asemhaling wat julle hoor terwyl ek uitasem raak op my fiets is vir spesiale effekte.

Ek het nogtans besluit om 'n paar videos van die roete te maak en dit vir julle op te laai om julle sodoende so 'n bietjie van 'n idee te gee hoe dit langs die roete lyk.

'n Mens kan op 'n paar plekke in die Fred Caterson Reserve parkeer. Ons het besluit om naby die BMX bane in die middel van die Reservaat te gaan stop en dan die paadjies daarvandaan te gaan verken.

Die eerste been van die roete begin soos volg:
Fietsry in die Fred Caterson Reservaat in Castle Hill (Deel 1 - Boendoe Bashing)



Ons het die fietsry roete afgeskop in die sentrale parkeerterrein naby die BMX baan.  Die roete gaan dan om die sokkerbane, verby die bofbalbaan en dan deur die bome tot waar dit uiteindelik by die groter paadjie aansluit. Hier en daar moet mens jou fiets so bietjie oor die rotse help, maar meeste van die pad kan mens gemaklik op jou fiets aanhou ry tussen die bome deur. Indien jy nie wil boendoe bashing doen nie, kan jy eerder agter die BMX baan by die breër paadjie aansluit en dit dan na regs volg tot waar dit Gilbert Road kruis.

Hier is die sonbril video van hierdie deel van die roete. (Vir my was dit nie minder mooi deel van die pad)



Nadat ons met die rowwe deel klaar was, was daar 'n lekker breë fietspaadjie met op plekke sementpad was. As jy met die paadjie aanhou kruis dit later Gilbert Road. Daar is 'n tonnel onder die pad deur en mens kan die paadjie verder volg totdat dit by Tuckwell Rd uitkom - dit is die pad wat by Castle Towers winkelsentrum  uitkom (en daar is sulke rooi strepe op die pad). Ons het tot daar gery en toe weer die paadjie terug geneem tot naby die BMX baan.

Fietsry in die Fred Caterson Reservaat in Castle Hill (Deel 2 - Die Noordelike deel)



Hier is die sonbril video van die tweede deel van die roete. Hierdie was 'n lekker deel om te ry en ook baie gelyk en meer groen.



Einde ten laaste die laaste been van die fietsroete...

Fietsry in die Fred Caterson Reservaat in Castle Hill (Deel 3 - Die Suidelike deel)



Ons het so 'n effense ruskansie gevat om water te drink en toe het ons die suidelike paadjie geneem vanaf die BMX baan, deur die bome verby sportvelde to by die Basketbal stadium.  Hier en daar kan 'n mens oor 'n bruggie ry om by die omliggende woongebied uit te kom. Mens kan ook aan die suid westelike kant by Cedar Grove en Brooke avenue aansluit. Hier is ook 'n plek waar jy jou kar sou kon parkeer om met die fietse te ry. Ons het verder verby die Hills Basketbal stadium gery en so 'n effense draai verby die tennisbane gemaak waarna ons terug is tot waar ek die kar geparkeer het.

Hier is die sonbril video van die laaste deel van die roete. Nogsteeds baie gelyk met goeie fietspaadjies. Hierdie is 'n lekker Sondagmiddag roete.



Ek het hier en daar van die videos verkort, soos met die oninteressante deel verby die tennisbane.

Ek hoop hierdie inskrywing sal vir julle 'n idee gee van hoe dit op die roete lyk.

Kontak my gerus...

Kontak my as julle wil deur 'n "Comment" by enige post te maak met julle email adres daarin. Ek kry alle "comments" as email voor dit gepubliseer word en sal nie enige telefoonnommers of email adresse op die blog laat kom nie maar dit slegs gebruik om julle te kontak. Groete.

Die mees populêre inskrywings